ಮಡುಗಟ್ಟಿದ ಮಾನವ ಪ್ರೀತಿ

elli-hodalu-eeke1

ಪ್ರಗತಿಯತ್ತ ದಾಪುಗಾಲು ಹಾಕುತ್ತಿರುವ ಸಾಮಾಜಿಕ ವ್ಯವಸ್ಥೆಗೆ ಪೂರಕವಾಗಿ ವ್ಯಾವಹಾರಿಕ ಸಂಬಂಧಗಳು ಬಲಗೊಳ್ಳುತ್ತಾ ಭಾವನಾತ್ಮಕ ಸಂಬಂಧಗಳ ಕೊಂಡಿ ಕಳಚಿಕೊಳ್ಳುತ್ತಿರುವುದನ್ನು ತಡೆಯುವುದು ಅನಿವಾರ್ಯವೆಂಬ ಎಚ್ಚರಿಕೆಯನ್ನು ಗುಂಡಣ್ಣ ಕಲಬುರ್ಗಿ `ಎಲ್ಲಿ ಹೋದಳು ಈಕೆಕವನ ಸಂಕಲನದಲ್ಲಿ ನೀಡಿದ್ದಾರೆ. ಬೆಳಗು ಜಗದ ಕತ್ತಲನ್ನು ಕರಗಿಸದಿರುವ ಪರಿಣಾಮದಿಂದ ಹಿರಿಯರು ಹೆಜ್ಜೆ ಇಟ್ಟ ಹೆದ್ದಾರಿ ಇಂದು ತಿರುವು ಪಡೆದು ಹಿಂಸಾಮಾರ್ಗಗಳಾಗಿ ಕವಲೊಡೆದು ಬದಲಾಗಿರುವುದಕ್ಕೆ ಕವಿಮನ ತಲ್ಲಣಿಸಿದೆ.

ಧರ್ಮದ ಹುಟ್ಟಿನ ಉದ್ದೇಶ ಭಾವನೆಗಳನ್ನು ಬೆಸೆದು ಆತ್ಮ ಪರಮಾತ್ಮರ ನಡುವಿನ ಅಂತರವನ್ನು ಕಡಿಮೆ ಮಾಡುವುದಕ್ಕಾಗಿ, ಆದರೆ ಪ್ರಸ್ತುತ ಪರಿಸರದಲ್ಲಿ ಧರ್ಮವನ್ನು ಸ್ವಾರ್ಥಕ್ಕಾಗಿ ಬಳಸಿಕೊಂಡು ಭಾವನೆಗಳನ್ನು ಭಿನ್ನಗೊಳಿಸುತ್ತಿರುವ ಅವ್ಯವಸ್ಥೆಯನ್ನು ವಿಡಂಬಿಸುವ ಆಶಯ ಹೊಂದಿರುವ ಕವನಗಳು ಈ ಸಂಕಲನದ ಪೂರ್ವಾರ್ಧದಲ್ಲಿ ಪ್ರಮುಖವಾಗಿವೆ. ಹನ್ನೆರಡನೇ ಶತಮಾನದಲ್ಲಿ ಮಾನವೀಯ ಮೌಲ್ಯಗಳನ್ನು ಜೀವಾಳವನ್ನಾಗಿಸಿಕೊಂಡು ಸಾಮಾಜಿಕ ಕ್ರಾಂತಿ ಮಾಡಿದ ಬಸವ ತತ್ವಗಳು ಸ್ವಾರ್ಥಿಗಳಿಂದ ಬದಲಾಗಿ ಸಾಮಾಜಿಕ ಭ್ರಾಂತಿಗಾಗಿ ಬಳಕೆಯಾಗುತ್ತಿರುವುದನ್ನು ಕವಿ ಕಂಡರಿಸುವುದು ಹೀಗೆ:

`ನಿನ್ನ ಸುತ್ತ ನೀರು ನಿಲ್ಲಿಸಿದ್ದು

ನಿರ್ಮಲತೆಗೆ ಧಕ್ಕೆ ಮಾಡಿದ್ದು –

ಸ್ಥಾವರಗಳ ಹಾವಳಿ ಕಂಡು

ಕರ್ಮಪಿಂಡದ ವಾಸನೆ ನೋಡಿ

ಬೇಸರ ಬಂತು ಬಸವಾ ಬೇಸರ ಬಂತು!

ದೀಪವಾಗಿ ಬೆಳಗಿದ ಬಸವಣ್ಣನ ವಿಚಾರಗಳನ್ನು ದ್ವೀಪವನ್ನಾಗಿಸುತ್ತಿರುವವರನ್ನು ಎಚ್ಚರಿಸುವ `ಬೇಸರವಿದೆ ಬಸವಾಕವನದ ಪ್ರತಿಯೊಂದು ಸಾಲು ಧರ್ಮ ರಕ್ಷಣೆಗಾಗಿ ಬಟ್ಟೆ ಬದಲಾಯಿಸಿಕೊಂಡು ಭಕ್ತಾದಿಗಳ ಗುಂಪು ಕಟ್ಟುತ್ತಿರುವ ಮನಕ್ಕೆ ಕನ್ನಡಿ ಹಿಡಿಯುತ್ತಾ ಮುಂದುವರಿಯುತ್ತವೆ.

ವಚನಕಾರರ ವಾಣಿ ಇಂದು `ಭಯವೇ ಧರ್ಮದ ಮೂಲಎಂದು ಬದಲಾಗಿ ಹಿಂಸಾತ್ಮಕ ಮಾರ್ಗದ ಮೂಲಕ ಧರ್ಮದ ರಕ್ಷಣೆ ನಡೆಯುತ್ತಿರುವುದನ್ನು ಮತ್ತು ಎಲ್ಲೆಡೆಯೂ ಗೋಮುಖ ವ್ಯಾಘ್ರರೇ ಹೆಚ್ಚಾಗುತ್ತಾ ಕ್ರೌರ್ಯ ಜಗತ್ತನ್ನು ಆಳುತ್ತಿರುವುದನ್ನು ಕವಿ ಖಂಡಿಸುತ್ತಾ ಅದರ ದರ್ಶನವನ್ನು ಹೀಗೆ ಮಾಡಿಸುತ್ತಾರೆ.

`ಎದೆಹಾಲ ಕುಡಿಸಿದ ಹಡೆದವ್ವನ ಕೊಲ್ಲುತಾರ / ಹಡೆದ ಕುಡಿಯ ಕೊಲ್ಲುತಾಳ, ಕಳ್ಳ ಹರಿದು ಚೆಲ್ಲುತಾಳ

ಮಾನವನ ಮನಸ್ಸಿನಲ್ಲಿ ಮೃದುತ್ವದ ಕಲ್ಪನೆಯೇ ಮೂಡದಂತೆ ಮಾಡುತ್ತಿರುವ ಮಲಿನ ಮನಸ್ಸುಗಳನ್ನು ತಿಳಿಗೊಳಿಸುವುದಕ್ಕೆ ಸಹಾಯಕವಾಗುವಂತೆ ಕವಿ ಕೇಳಿಕೊಳ್ಳುವುದು ಶಿವನನ್ನು. ಸಾಮಾಜಿಕ ಸ್ಥಿರತೆಯನ್ನು ಸಡಿಲಗೊಳಿಸುತ್ತಿರುವ ಮನಸ್ಸುಗಳನ್ನು ಪರಿವರ್ತಿಸಿ ಅವುಗಳ ನಡುವೆ ಬಾಂಧವ್ಯದ ಬೆಸುಗೆ ಹಾಕುವ ಆಶಯದ ಹಲವು ಕವನಗಳಲ್ಲಿ ಜೀವನ ಪ್ರೀತಿ ಪರವಾದ ಕಳಕಳಿಯ ವಿನಂತಿ ಪ್ರತಿಧ್ವನಿಸಿದೆ. ಪ್ರೀತಿ ಕಳೆದುಕೊಂಡು ನೀತಿಬಾಹಿರ ಕೈಗಳ ಹಿಡಿತಕ್ಕೆ ಸಿಕ್ಕಿ ನೋವುಂಡವರ ಬಗ್ಗೆ ಕವಿ ಹೃದಯ ಮಿಡಿದಿದೆ.

ವಿಶ್ವ ಮಾನವ ಪ್ರಜ್ಞೆ ಮೂಡಿಸುವ ಕನಸು ಕಂಡ ಕುವೆಂಪು, ಹುಟ್ಟಿ ಬೆಳೆದ ಪರಿಸರ ಕಂಡು ಭಾವಪರವಶರಾದ ಗುಂಡಣ್ಣನವರು ಕುಪ್ಪಳ್ಳಿ ಪರಿಸರದ ಪ್ರಶಂಸೆಯೊಂದಿಗೆ ಕವಿ ನಮನ ಅರ್ಪಿಸುವ ಮತ್ತು ಕಲಾಂ ಅವರ ವ್ಯಕ್ತಿತ್ವಕ್ಕೆ ಮರುಳಾಗಿ ಅವರನ್ನು ವಸ್ತುವನ್ನಾಗಿಸಿಕೊಂಡ ಕವನಗಳು ಗಮನ ಸೆಳೆಯುತ್ತವೆ.

ಬದಲಾಗುತ್ತಿರುವ ಬದುಕಿನ ಕಕ್ಷೆಯ ಸುತ್ತ ತಿರುಗುವ ಕವಿ ಭಾವ, ಮನದಲ್ಲಿ ಮನೆ ಮಾಡಿಕೊಂಡು ಜಗತ್ತನ್ನು ಆಳುತ್ತಿರುವ ಕ್ರೂರತೆಯ ನಾಶಕ್ಕಾಗಿ ಕರೆ ನೀಡುತ್ತದೆ. ದೈನಂದಿಕ ತಲ್ಲಣಗಳಿಂದ ಆಗುತ್ತಿರುವ ಅನಾಹುತಗಳಲ್ಲಿ ಹತಾಶರಾದವರ ಬಗ್ಗೆ ಅನುಕಂಪವಿದೆ. ಮಾನವ ಪ್ರೀತಿಯನ್ನು ಮರೆತ, ಪ್ರಗತಿಪರ ಧೋರಣೆಗಳೊಂದಿಗೆ ಎಂದೂ ರಾಜಿ ಮಾಡಿಕೊಳ್ಳದ ಕವಿ, ಬದುಕನ್ನು ಬೆಸೆಯುವ ಮನಸ್ಸುಗಳನ್ನು ರೂಪಿಸುವಲ್ಲಿ ಕಾವ್ಯ ನೆರವಾಗಬೇಕೆಂದು ಬಯಸಿದ್ದಾರೆ. ಜೀವ ವಿರೋಧಿ ವ್ಯವಸ್ಥೆಯ ವಿರುದ್ಧದ ಬಂಡಾಯ ಧ್ವನಿಗಿಂತ ಹೆಚ್ಚಾಗಿ ನೈತಿಕತೆಯೆಡೆಗೆ ಮನ ಪರಿವರ್ತಿಸುವ ಭಾವನಾತ್ಮಕ ಸೂಚನೆಗಳು ಕವನಗಳಲ್ಲಿವೆ.

ಸೈಯದ್ ಝಮೀರುಲ್ಲಾ ಷರೀಫ್

ಶೀರ್ಷಿಕೆ: ಎಲ್ಲಿ ಹೋದಳು ಈಕೆ ಲೇಖಕರು: ಗುಂಡಣ್ಣ ಕಲಬುರ್ಗಿ ಪ್ರಕಾಶಕರು: ಸೌಜನ್ಯ ಪ್ರಕಾಶನ ಪುಟಗಳು: 110 ಬೆಲೆ:ರೂ.100/-

ಕೃಪೆ : ಪ್ರಜಾವಾಣಿ

ತುಂಬಿ ಬಂದಡೆ ಪರಿಮಳ ಓಡಿತ್ತ ಕಂಡೆ

scan0027ಎಲ್ಲ ಭಾರತೀಯ ಭಾಷೆಗಳು ಜೀವಂತವಾಗಿ ತಮ್ಮ ಶಕ್ತಿ-ಸಾಮಥ್ರ್ಯವನ್ನು ಪ್ರಕಟಿಸಲು ಸಜ್ಜಾಗುವುದೆಂದರೆ ಸೃಜನಶೀಲತೆಯನ್ನು ಸಾಮಾಜಿಕ ಸನ್ನಿವೇಶದಲ್ಲಿ, ಜಾಗತಿಕ ಇಕ್ಕಟ್ಟಿನಲ್ಲಿ ಎಚ್ಚರಾಗಿಸಿಕೊಳ್ಳುವುದೆಂದೇ ಅರ್ಥ. ಇಂದಿನ ಅತ್ಯಂತ ಆಳವಾದ ಬಿಕ್ಕಟ್ಟಿನ `ಕನ್ನಡ ಕಾವ್ಯತನ್ನ ಸೃಜನಮುಖವನ್ನು ಪ್ರಖರವಾಗಿಸಿಕೊಳ್ಳಲು ಮೈಯೆಲ್ಲಾ ಕಾಲು, ನಾಲಿಗೆಯಾಗಿಸಿಕೊಳ್ಳಬೇಕಾಗಿದೆ. ಈ ಪ್ರಯತ್ನದ ಹಾದಿಯಲ್ಲಿ ಕವಿಗಳು ತಮ್ಮ ಸೃಷ್ಟಿಕ್ರಿಯೆಗಳನ್ನು ಪ್ರಶ್ನಿಸಿಕೊಳ್ಳುತ್ತಾ ಸಾಗಿದಾಗ ಮಾತ್ರ ಬಾಳಿನ ಬಿಕ್ಕಟ್ಟುಗಳಿಗೆ ಪ್ರತಿಕ್ರಿಯಿಸಲು ಸಾಧ್ಯವಾಗುತ್ತದೆ.

`ಜಾಗತೀಕರಣದ ಎದುರಲ್ಲಿ: ಕವಿತೆಲೇಖನದಲ್ಲಿರುವ ಮೇಲಿನ ಸಾಲುಗಳು ಡಾ.ಗುಂಡಣ್ಣ ಕಲಬುರ್ಗಿಯವರ `ತುಂಬಿ ಬಂದಡೆ ಪರಿಮಳ ಓಡಿತ್ತ ಕಂಡೆಕೃತಿಯ ಒಟ್ಟಾರೆ ಉದ್ದೇಶದಂತೆಯೂ ತಾನೇ ಸೃಷ್ಟಿಸಿಕೊಂಡ ಚೌಕಟ್ಟಿನಂತೆಯೂ ಕಾಣುತ್ತದೆ.

ವೃತ್ತಿಯಿಂದ ಮೇಷ್ಟ್ರಾದ ಗುಂಡಣ್ಣನವರು ಕಥೆ, ಕವಿತೆ ಬರೆದವರು. ಇಲ್ಲಿನ ಲೇಖನಗಳಲ್ಲೂ ಕಥೆಗಾರನ/ಕವಿಯ ಭಾಷಾಶೈಲಿಯಿದೆ. ಬಹುತೇಕ ಲೇಖನಗಳು ವಿಮರ್ಶೆಯ ನೆಲೆಗಟ್ಟಿನಲ್ಲಿ ಚಿಂತಿಸಿದರೂ ವಿಮರ್ಶೆಯ ಖಾಚಿತ್ಯ ಹಾಗೂ ಒಳನೋಟಗಳು ಇಲ್ಲಿ ಸಾಧ್ಯವಾಗಿಲ್ಲ.

ಸಂಕಲನದ ಸಫಲತೆಯಿರುವುದು ಲೇಖಕನ ಸಹೃದಯಿ ಮನಸ್ಸು ಓದುಗರನ್ನು ಕನ್ನಡ ಸಾಂಸ್ಕೃತಿಕ ಲೋಕದತ್ತ ಸೆಳೆಯುವ ಪ್ರಯತ್ನದಲ್ಲಿ. ಕಣವಿ, ಕಂಬಾರ, ಲಂಕೇಶರನ್ನು ಅವರ ಕೃತಿಗಳ ಮೂಲಕವೇ ಶೋಧಿಸುವ ಲೇಖಕರು ವಚನ ಸಾಹಿತ್ಯ ಸಂಗ್ರಹಗಳನ್ನೂ ಚರ್ಚಿಸುತ್ತಾರೆ. ಅವರ ಈ ಪ್ರಯತ್ನ ಮೈಯೆಲ್ಲಾ ಕಾಲು ಕೈಯಾಗಿಸುವ ಪ್ರಯತ್ನದಂತಿದೆ. ಈ ಪ್ರಕ್ರಿಯೆಯಲ್ಲಿ ಕಣ್ಣೂ ಮೂಡಿದ್ದರೆ ಚೆನ್ನಾಗಿತ್ತು.

ಪುಸ್ತಕ ಅಚ್ಚುಕಟ್ಟಾಗಿದೆ, ಸುಂದರವಾಗಿದೆ. ಆದರೆ 190 ಪುಟಗಳ ಪುಸ್ತಕಕ್ಕೆ 220 ರೂಪಾಯಿಯ ಬೆಲೆ ಅತಾರ್ಕಿಕ. ಈ ಅಸಂಗತ, ಜಾಗತೀಕರಣದ ಎದುರಲ್ಲಿ ಕವಿತೆ ಎದುರಿಸುತ್ತಿರುವ ರೀತಿಯದು.

ಲೇಖಕರ ಅಧ್ಯಯನಶೀಲತೆ ಹಾಗೂ ಸಂಘಟನಾ ಚಾತುರ್ಯವನ್ನು ಬೆನ್ನುಡಿಯಲ್ಲಿ ಚೆನ್ನವೀರ ಕಣವಿ ಮೆಚ್ಚಿಕೊಂಡಿದ್ದಾರೆ. ಪುಸ್ತಕದಲ್ಲಿ ಕಣವಿ ಕೃತಿಗಳಿಗೆ ಸಂಬಂಧಿಸಿದಂತೆಯೇ ಮೂರು ಲೇಖನಗಳಿವೆ.

ಶೀರ್ಷಿಕೆ:ತುಂಬಿ ಬಂದಡೆ ಪರಿಮಳ ಓಡಿತ್ತ ಕಂಡೆ ಲೇಖಕರು: ಡಾ. ಗುಂಡಣ್ಣ ಕಲಬುರ್ಗಿ ಪ್ರಕಾಶಕರು: ಸೌಜನ್ಯ ಪ್ರಕಾಶನ ಪುಟಗಳು :190 ಬೆಲೆ:ರೂ.220/-

ಕೃಪೆ : ಪ್ರಜಾವಾಣಿ